كفايه حرام

هو احنا ليه بقى قلبنا جامد اوى على اننا نعصى ربنا
عارف اننا بشر و مش معصومين من الخطأ

بس بجد ليه قلبنا جامد كدا و بنتجرأ على اننا نخطأ
ممكن اه مننا بيرجع و يستغفر و ان شاء الله ربنا يسامحه

بس برضوا ليه بنتجرا على الله


من حوالى شهرين كدا
كنت بتفرج على حلقه للشيخ الدكتور / حازم شومان
بارك الله فيه

قال جمله حلوه فيما معناها

اننا لما نبعد عن اوامر الرسول " صلى الله عليه وسلم " او نسيب سنته ممكن دا يكلفنا كتير اوى و احنا مش حاسيين

و جت على بالى الفتره دى و فضلت افكر فيها فعلا
بما ان العالم الايام دى بيمر بازمه ماليه و اقتصاديه

كان لازم نربط بين الاثنين

تخيلت اننا بنصرف قد ايه " فلوس" على حاجات هى غلط و بتغضب ربنا

خلينا فى مصر بس

فى كام واحد مش ملتحى " بصرف النظر عن انها فرض او سنه " و بعيد عن التعصب

لو قولنا مثلا 10 مليون بس بيحلقوا دقنهم
اقل حاجه فى الشهر ب 10 جنيه بس

عارفين يبقوا بيصرفوا كام كل شهر على حاجه بيحبها الرسول و ربنا

تقريباً 100 مليون جنيه
******

فى كام بنت بتصرف فلوسها و مصروفها على ملابس لا ترضى الله و رسوله
و على المكياج "فى غير محله "

لو قولنا فى 10مليون برضوا بنت بس

بس دا مش عشره جنيه بقى دى الملابس و المكياج يعملوا متوسط كدا 50 جنيه موزعين على الشهور تقريباً يعنى

يعملوا كام برضوا
حوالى 500 مليون جنيه

و فى الاخر شكلهم منبوذ و بيغضبوا ربنا و رسوله


كام شريط كاست للمغنيين سنوياً مليون بس و كل شريط بعشره جنيه على الاقل
10 مليون جنيه يعنى

قيس بقى على كدا

كام مليون على الحفلات و السهرات و الخمور

كام مليون على السجاير و المخدرات

كام مليون على مكالمات الموبيل بين الحبيبه و بكلام يغضب ربنا

كام مليون على على السينمات و المسارح و المصايف

كام مليون على المجلات و الصحف الغير مفيده

كام مليون على الرسائل و النغمات و التصويت على الفضائيات و ميلودى و مزيكا و استار اكاديمى
و 0900 و غيرها


كام مليون على و على و على

عدوا انتو بقى

اعتقد اننا كدا ممكن نوصل كل شهر لبليون جنيه او اكتر

و فى الاخر نقول اصل البلد مفلسه و مديونه

اصل الناس مش لاقيه تأكل
و الله نستاهل

لا تعليق

وزير الماليه واااااااااااااااااااااااضح انه شايف شغله

يااااااااااااااااااااا رب

امبارح قابلت واحد صاحبى

كان شاف المدونه بتعتى دى

و قالى ايه يا عم انت مالك كدا بقيت بتخبط فى الناس الكبيره بتاعه البلد

خلى بالك من نفسك يابنى

قولتله هو انا كدا بخبط فى حد

انا بقول رأيى فى الاحداث اللى بتحصل حولينا

.........................

و بعد كدا فضلت اسال نفسى

هو احنا بنفترى على الحكومه و لا ايه ؟

هل هما فعلا كويسيين بس محدش حاسس بيهم ؟

اكيد الشعب بتعنا مش كله ملائكه ...

بس مش معنى كدا انه كله شياطين يعنى و يستاهل منهم المعامله دى

هل فعلا الحكومه دى كلامهم صدق ؟

طب ايه الدليل

ليه مش يطلعوا كدا قدام الناس و يكسبوا ثقتهم و يبقى كل شىء واضح

ليه بنحس ديماً انهم بيغشونا و بينهبوا ثروات البلد دى

ليه كل يوم نسمع عن حادثه فساد و سرقه و تهريب و تزوير ؟؟

و الجرايد القوميه فى وادى و المعارضه فى وادى

بجد لو حد شاف النوعين دول ميقولش الاتنين فى نفس البلد

واحده مخليه الدنيا ورد و فل

و التانيه فساد و سرقه

ليه بيحسسوا الناس ان فى بينهم فجوه كبيره

ليه محدش بيصدقهم ؟؟

ليه محدش بيدعيلهم ؟؟

ليه ؟؟

يا رب انت بس اللى عالم بكل الناس دى

انت بس اللى تعرف مين اللى كويس و مين الوحش

يا رب انت بس بأيدك تنصر الحق

ياااااااااااااااااااااااااا رب

بحب بلدى اوى

نفسى اشوفها فى احسن حال

نفسى احس انها فى امان

الحمد لله ...... خش علينا

النهارده فى المصرى اليوم كان فى خبر لمفيد شهاب و هو بيقول احمدوا ربنا
و يبدوا ان الوزراء مش بقى عندهم غير احمدوا ربنا
على الاسعار و الطوارىء و الفساد و السرقه و انتهاك حقوق الانسان و ... و..

ناقص بعد كدا يقولوا احمدوا ربنا اننا معيشنكم فى البلد
على اساس انها بلدهم يعنى و احنا ملناش فيها

و علق كمان دكتور مفيد على ان القانون بيطبق على الارهابيين و لو القانون ده بيطبق على كل الناس مكنش حد هيقدر يفتح بقه فى البلد و لا كان فى جرايد معارضه و لا مدونين
و مكنش هيكون فى حد برا السجون

امال الناس اللى اعتقلت دى كان تهمتهم ايه و اسراء عبد الفتاح اتخدت ليه و ابراهيم عيسى عليه قضيه ليه

و فى نفس الموضوع برضوا اللى فى الصوره اللى جايه دى بقى العضو المحترم / على عطوه
و هو بيخرج لسانه للمعارضين علشان الاغلبيه وافقت على مد القانون
هو ممكن يكون صح بيطلع لسانه او لا يمكن نكون بنظلمه و يكون بوقه اتعوج من كتر الضحك على الشعب

و واضح فى الصوره برضوا باقى النواب و هما سعداء جداً جداً انهم هيعكننوا على الشعب اللى للاسف اختارهم
دا ان كان اخترهم صحيح و منجحوش بالتزوير

هى نقصاك انت كمان ....!

كالعاده يوافق مجلس الشعب على اللى الشعب مش عايزه ... ربنا يخليهم ... و يخلى اللى خلاهم

و كمان الحكومه تتعهد باستخدامه لحمايه المواطن ... طب ازاى و بأماره ايه و مصلحه مين

طب لما انتو خايفين اوى من الشعب كدا و مش عايزين تلغو القانون ده

طب مش خايفين من ربنا ... اللى قانونه مش بيتلغى

ولا يلااااااااااا هى جت على القانون ده ... قال سنتين كمان قال

كويس انهم مش هيخلوا القانون ده بفلوس و عليه ضرايب زى ضريبه المبيعات و ضريبه العقارات

يعملوا ضريبه الطوارىء

يعنى اللى يتهان يدفع ضريبه مش بيستخدم قانون

و لولا انه يستاهل يتهان كانوا لغوا القانون

يبقى من حقهم يدفعوه ضريبه

دا مش بعيد يعملوا مدينه يسموها طوارىء

و يفضل الواد ينادى على العربيه

طوارىء... طوارىء ... طوارىء يا بيه

ــــــــــــــــــــــــــــــــــــــــــــــــــــــــ

اهلا بيكى يا طوارىء ...

بنحمد ربنا يا عم من قبل ما نشوفكوا

الخبر ده اتحفنا بيه الاخ العزيز وزير التضامن ....

يا سياده الوزير الشعب كله بيقول الحمد لله ..... ماعدا انتو مش بتحمدوا ربنا على اللى معاكوا و النعيم اللى انتو عايشيين فيه

ثم كمان حضرتك عايزنا نستحمل عشر سنوات فى الحال ده

معتقدش

ما يااما الشعب هيكون مااااااات

يا اما انتو اللى هتموتوا

بس ربنا يسهل و مش تكونوا متوا من كتر دعاء الناس عليكوا

ياسياده الوزير دا انت حتى المفروض وزير الغلابه و الجهات اللى المفروض تصرف على الغلابه

سياده الوزير

ااااتشييييييى

الحمد لله .... يرحمكم الله

هو فى ايه .... ؟؟؟؟

من يومين كل ميلاد الرئيس اللى تم فيه عامه الـ 80 و اقترب فيه من عامه الـ 27 من فتره رئاسته فى اليوم ده بجد بقيت تايه

مش عارف افهم حاجه اشوف الجرايد القوميه الاقى فيها مدح و ثناء على الريس و جهوده و انجازاته و صموده

اشوف جرايد تانيه اللى تابعه للمعارضه الاقى كلام تانى خالص كلام وحش و شتيمه وعرض لتاريخ سىء لفتره الرئاسه

و نفس الكلام على التلفزيون القنوات التابع للاذاعه و التلفزيون المصرى اغانى و تهانى و لقاءات عن الريس

و القنوات التانيه على العكس تماماً بجد بقيت قاعد و مش عارف افهم طب مين فيهم صح صور بتهتف للريس

و صور تانيه فيها ناس بتدوس على صوره الريس

بجد نفسى حد يقولى مين فيهم على حقو مين فيهم بيكذب علينا

من ضمن الاحاديث كان فى لقاء للريس و حرمه على قناه النيل للمنوعات الريس بيقول فيه انه تربى على الدين الاسلامى و سماحته و ان الاسلام مش بس صلاه و صوم و لكن الدين المعامله

بجد اللقاء كان جميل انا شخصياً كنت سعيد بالكلام اللى بيتقال

و على النقيض تلاقى حاجات تانيه بيتعرض فيها ان الدين مش المعامله بين المواطنين العاديين و الشرطه بتاعتنا

فهل الريس ميعرفش باللى بيحصل ده هل فى تعتيم على الاحداث انها مش توصل للريس و هل الريس مش حاسس باللى الناس فيه

كلام كتير اوى انا اتنمى ان بجد يكون فى مناظره بين الريس مثلا او متحدث بأسمه او رئيس الوزاره فى مقابله مع حد يتكلم بأسم الشعب حد يكون فاهم

يعرض كل موضوع و نشوفحد مش كل همه المعارضه و بس حد بيحب بلده

بجد انا لو فضلت اكتب هكتب من هنا لبكره فى ملايين علامات الاستفهام على كل حاجه

كلام عن نمو و ازدهار و استثمار

و كلام عن فقر و سوء اداره و سرقه و نهب

بجد انا خلااااااااااااااااص تعبت اوى نفسى افهم هو فى ايه ؟؟؟؟؟

مدد ... مدد

الايام بيحتفل بعض الناس ( مش عارف اصنفهم )

بما يسمونه " مولد سيدنا الحسين "

الغريب انهم بينسبوا ده للدين و بيعتقدوا انهم بكدا بيتقربوا لله بس عن طريق الواسطه

هل التقرب لله بيكون بالشكل ده بالتطويح و هز الوسط

هل التقرب لله بيكون على انغام " الرق" و الطبله

هل التقرب لله بيكون فى وسط زحمه الرجاله على الستات

هل التقرب لله بيكون بالمسح على الحديد و " نبوسه "

نتمنى ان بجد الناس تسيبها من الدروشه دى الى قد تصل على حد الشرك بالله

................................

فالى اى دين ينتمون و اللى اى اله يتقربون

اللهو الخفى

بقالى كام يوم كدا كل ما امشى فى الشارع او اكون راكب عربيه و حد معدى جنبى

الاقى الشخص ده بيتكلم مع حد و مندمج جداً معاه فى الحوار

افضل ابص حواليه الاقيه ماشى لوحده او راكب فى عربيه لوحده و مره كان منهم واحد سواق تاكسى

المهم قولت و الله يبدو ان حال الناس تحسن لدرجه انهم خلاص معظمهم معاه سماعات بلوتوث و من الغاليه الصغيره دى اللى مش بتبان و هى فى الودن

و مع الوقت و من كتر ما شوفت ناس كدا

و غير ان فى ناس بصراحه شكلهم ميديش انهم حتى معاهم اقدم جهاز محمول نزل مصر

بدأت اركز شويه معاهم فى كلامهم فى ودانهم اللى فيها البلوتوث ده

لاقيت الناس ودانها فاضيه .... اه فاضيه

قولت امال هما بيكلموا مين

بيشتكوا لمين ؟؟

و بشتكوا مين ؟؟

طلعت الناس دى بتكلم نفسها .... اه و الله بتكلم نفسها

دا مش بس كدا دول فى منهم بقى بيضرب نفسه

ناس يتزعق بمنتهى الحرقه

كان الاول لما تشوف حد كدا بمجرد ما تبص له تلاقيه اكنه اتكسف

دلوقتى بقى لو بصيت له تلاقيه فتح على الرابع ما صدق لاقى حد يعبره و يقوله مالك بتشتكى من ايه ؟

لحد ما من يومين كدا و انا راكب الميكروباص لاقيت واحد من الناس و شكله محترم جداً و يدى على 45 سنه كدا

بيطلع دماغه من الشباك و عمال يشتم

حرام عليكوا يا كفره حرااااااااااام هو احنا لاقين ناكل ...... و كلام تانى كبير اوى بقى

بصيت عليه هو بيكلم مين لاقيت فى رصيف فى الشارع من اللى حكيت لكوا عليهم قبل كدا بيغيره

دا بقى اللى جنن الراجل هما عمالين يصرفوا علي الرصيف مبالغ كبيرة و هو مش لاقى ياكل

و طبعاً مش مشكله رصيف و غلاء اسعار و لا .... و لا ..... و لا ..... و بس

مشكله كل حاجه بقت فينا

كل حاجه حوالينا ..... و ربنا يسترها علينا

مصر بتتقدم بينا

الوطنى فى محليات 2008 ... مصر بتدخل عصر جديد

الوطنى فى المحليات 2008 ... فكر جديد .. و التزام بأولوياتك

الوطنى فى المحليات 2008 .... سلطه حقيقية لك و لمجلسك الشعبى

الوطنى فى المحليات 2008 .... برنامج متكامل

الوطنى فى المحليات 2008 .... العداله الاجتماعيه و الخدمات

صوتك للوطنى .....

الصحف :-

انتخابات المحليات تجرى الثلاثاء بعد حسم 90% من المقاعد للوطني بالتزكية

اكيد هيكون صوتى للوطنى ... لانى مش هلاقى حد غيره

مش هلاقى حد غيره كلامه كله صدق ... مش هلاقى حد غيره افكاره كلها جديده

لانى مش هلاقى حد غيره برا السجون و المعتقلات

مش هلاقى حد غيره مصر هتتقدم بيه

مش هلاقى حد غيره يعيشنا مستورين

مش هلاقى حد غيره بيحترم الرأى و الديمقراطيه



و عجبى

اهلا بيك يا سيادة الوزير المحافظ

و انا جاى النهاردة على شغلى لاقيت الدنيا غريبه حوليا حاسس ان الوضع مش طبيعى قولت هو فى ايه يا جماعه الدنيا مالها متغيره و بتلمع اوى كدا و الورد فى كل مكان و الزباله اللى فى الشارع مش موجودة

لاقيت محدش من اللى راكبين معايا الميكروباص عارفين فى ايه .. قولنا اخيراً المسئولين اهتموا بشغلهم ...!!!

بس الكورنيش كان زحمه شويه و العربيات بتمشى ببطء و فجأة

عرفت فى ايه ......... المحافظ جاى بلدنا يا رجاله ..!!!

ورد ايه و نظافة ايه

تخيلوا انهم بيغسلوا الشارع ... اى و الله بيغسلوا الشارع بالماء و الصابون يا حضرات

كان نفسى اعرف اصور المنظر ده كله بس معرفتش غير انى اصور صورة واحده بس

قولت و الله ان كان المحافظ هيشوف الشارع بالنظافه دى هيقول ايه ؟؟

هيقول انا محافظتى " الجيزة " انظف محافظة فى مصر

طب ان كانت زيارة السيد الوزير المحافظ هتعمل فينا كدا يا ريت بقى يجى يزورنا كل يوم و الله

يجى يشوف منظر البلد عامل ازاى

يجى يركب معانا الميكروباصات كل يوم و يشوف استغلال السائقين للركاب و انهم ازاى بيحملوا على مراحل علشان يغلوا الاجرة

يجى يقف فى طوابير العيش

يجى يتفرج على الزباله اللى موجوده فى كل مكان

بس يا سلام لو جه من غير ما حد يعرف

او حتى يغير بس خط سيره يعنى صدقونى لو دخل بس شارع يمين او شمال غير اللى المفروض يمشى فيه مش هيشوف الورد فى كل الشوارع ... هيشوف زباله فى كل الشوارع حتى من كترها الناس بتفكر تاكلها بدل العيش اللى مش لاقينه ......

الله يرحمك يا بمبوطي

من يومين و اكيد كلكوا سمعتوا عن الخبر ده

و هو مقتل البمبوطي محمد فؤاد عفيفي و هو شاب من السويس

اتقتل من سفينه امريكيه كانت فى منطقه الغاطس فى خليج السويس يعنى كانت لسه هتدخل قناة السويس

طيب فى تصريح ..... " جريدة الاهرام "

أن مصر لن تتهاون في حق أي مصري وبرغم اعتذار بوش والإدارة الأمريكية والسفارة الأمريكية في مصر‏ عن حادث السفينة الحربية الأمريكية فإن مصر تتابع التحقيقات الأمريكية حول الحادث‏ وستحاسب المخطئ‏

الكلام دا سمعناه كتير و كل مرة حد مصرى يتقتل بنسمعه سواء من الامريكان او الاسرائليين اللى كل كام يوم يقتلوا حد على الحدود و لا حد بيحاسبهم

و نسمع بعدها اننا مش هنسيب حق المواطنين بتوعنا ..... و دا كالعادة مش بيحصل

و المصيبه ان السفينه دى خرجت من القناة تحت حراسه مصريه

و ان السفينه دى كان عليها مخلفات نوويه و كانت جايه من العراق و الله اعلم رايحه فين ؟؟؟؟؟؟؟؟؟؟؟؟

كلنا عرب

ماتت قلوب الناس

ماتت بينا النخوة

يمكن نسينا في يوم

ان العرب ((أخـــــــوه))

سعودي يمني عماني اماراتي قطري بحريني كويتي

عراقي اردني سوري لبناني فلسطيني مصري سوداني

ليبي تونسي جزائري مغربي موريتاني صومالي جيبوتي

كلنا عرب ...... و لحد امتى ؟؟؟

كفايه بقى يا .......

من يجى 100 سنه و الكورنيش عمره ما بيفضى
عمره ما بيفضى من اللى بنقول عليهم الحبيبه ...
كل يوم اعدى على الكورنيش وانا رايح شغلى و كل يوم نفس المنظر تقريباً الصبيان و البنات دول مش بيروحوا

الغريب ان الصبيان دول بيضحكوا على البنات و بيشتغلوهم

و لا واد فيهم بيحب اى بيت فيهم و الدليل ان العلاقات دى كلها بتنتهى بالفشل

بالفشل من كل جانب..... و لا هما اصلا فاهمين فى الحب و لا حاجه و لا الواد دا لاقى يأكل ...و المهم انه لسه طالب و بياخد مصروف من مامته قبل ما ينزل يروح المعهد بتاعه او الجامعه

و بيشتغلوا البنات

و الاغرب ان البنات من مئات السنين مصدقين ان الولاد دول بيحبوهم و هيتجوزوهم و ميعرفوش انه ممكن بعد ما بيتنهى ميعادهم مع بعض .... هيقابل واحده تانيه

لحد امتى هنفضل على الحال دا

لحد امتى هيفضل كل اب و كل ام مش بيعرفوا بناتهم دول رايحين فين

لحد امتى هنفضل نشوه صورة الحجاب اللى بقى مجرد منظر و Look

هل هنفضل نقضى وقتنا كله كدا

انا مش مع ....... !!!

من يومين واحد صاحبى شاف المدونه دى و قالى ياه اخيراً احمد قرر يعمل مدونه ليه ... ايه اللى اخرك اوى كدا

و بعد ما قراها قالى .... ايه دا انت كمان بتكتب عن السياسه ؟؟

قولتله .... لأ مش مسألة سياسه هى مجرد رأى و أحداث بتمر قدام عنينا و بنعلق عليها

قالى .... طب انت بقى مع مين فيهم بالظبط ؟؟

الاخوان .. قولتله لأ نهائى مع احترامى لناس كتير منهم إلا انى معترض على طريقتهم و اسلوبهم و عنادهم مع السلطة حتى لو كانت البلد الدنيا فيها بايظه

لازم نعرف تنعايش مع بعض و نتواصل مع بعض

قالى تبقى مع الحزب ... قولتله مع انى عضو فيه ... برضوا لأ لانى شايف ان فى سلبيات كتيره فيه و تعنت فى القرارات و احتكار للافكار

قالى امال انت مع انهى حزب بقى ... قولتله احزاب ايه يا عم دول بصراحه قلتهم احسن ملهمش اى دور و لا اى قوة سياسيه

قالى ... امال انت مع مين بقى يا عم حيرتنى.. !!؟؟

قولتله انا مع الناس الغلابه اللى ملايين الشوارع ...

مع الناس اللى بتموت علشان تشترى رغيف عيش ...

مع الناس اللى بتنام من غير عشاء ...

مع الناس اللى بتنام على الرصيف ...

مع الناس اللى حقها ضايع ...

مع الناس اللى بتحلم انها تعيش مسطورة ...

مع الناس اللى ماشيين جنب الحيط ...

مع كل المصريين اللى بيحبوا مصر

مع الناس اللى نفسها تشوف مصر احسن بلد فى الدنيا

مع الحق ... مع الخير ...